Ū chit-jit, kiâⁿ tī lo-nih, thoân-lâi chhiòⁿ-koa ê siaⁿ,
na kiâⁿ, na chim-chiok kā thiaⁿ…
m-sī liû-hêng koa, mā m-sī khàu-tiāu-á,
sī hiah-nih pêng-chēng, hô-hâi, un-loán, kam-tiⁿ...
ho góa ê kha ná kiâⁿ ná khin-khoài, ná kiâⁿ ná óa.
Kiâⁿ beh kàu ê sî,
khòaⁿ-tioh saⁿ ê hū-lú chē tī kheh-thiaⁿ,
sûn-phok ê chhēng-chhah, chong-giâm ê chu-thài,
choan-sim, tâng-sim khin-siaⁿ teh gîm-si o-ló Chú Ia-so .
Ná-chhioⁿ kú-kú bô puh-gê ê hoe-chí,
it-tit puh-íⁿ, khui-hoe; it-tit puh-íⁿ, khui-hoe,
chit-chūn chit-chūn chhèng-chhut ê phang-bī,
siâⁿ chhù-piⁿ, khiā óa thang-á-kha.
Koh ū chit ê àm-thâu-á, kiâⁿ tī sió-hāng,
mā siāng-khoán thiaⁿ-tioh gîm-si ê siaⁿ.
Chit-ê óa—khì,
khòaⁿ-tioh in tau chit-ke lâng chē tī kheh-thiaⁿ,
ū sè-kiáⁿ ê siaⁿ, lāu-tōa-lâng ê siaⁿ, mā-ū chú-lâng ê siaⁿ,
sī chhiong-móa hí-lok, pêng-an, khùi-lat ê si-koa.
Chú Siōng-tè so sū ê hoaⁿ-hí kap an-tēng, sèng-kiat kap hô-hâi,
chià-tioh kheh-thiaⁿ ê teng-kng chioh chhut gōa-bīn,
ho góa ê kha bián tioh-tak, sim-koaⁿ-thâu mā chin sio-lō,
bak-kho soah tâm-tâm.
Tī Chú-jit chá-khí, khì kàu-hōe ê lo-tiong,
khòaⁿ-tioh lâm-lú ló-iù tùi sù-bīn-pat-hong tâng-chê kha-po,
chit-ê tòe chit-ê kiâⁿ ǹg kàu-hōe,
chit-chhiú kiah phang ê hoe, chit-chhiú kōaⁿ Sèng-keng-si;
Na kiâⁿ na o-ló Chú Ia-so ,
sī siōng-chàn Siōng-chú ê koa-siaⁿ,
lú-lâi lú hiáng-liāng, lú-lâi lú jiat-chhiat,
hô-téng ê chòng-koan, hô-téng ê kî-biāu ah !
Chiàⁿ-sī Sam-ūi-it-thé ê Siōng-chú hián-hiān tī in tiong-kan,
tit-tioh èng-tit ê êng-kng kap o-ló, kūi-pài kap chun-chông.
Lâm-thâm Kui-jîn Tâi-lâm Tâi-oân Ngô͘, Iok-hān (Tong-phek 1952- ) 2024/07/13
